MAC 2022
Panggau Dayak Disadang Tembu Ujung Disember 2022
KUCHING: Projek ngaga Panggau Dayak semilan ringkat begembar diatu benung digaga lalu disadang deka tembu ujung Disember taun tu.
Sapit Premier Sarawak, Datuk Amar Douglas Uggah Embas madah, projek ke digaga ba tanah dua hektar pemesai nya ari saup Yayasan Kebudayaan Dayak (DCF) enggau Balai Dagang enggau Industri Dayak (DCCI).
“Enggau penembu Panggau Dayak, DCF enggau DCCI deka bisi indu opis diri empu nangkan ke tu ila,” pia ku iya madah udah ke ngabas projek nya ba Jalai Ong Tiang Swee di Kuching, kena Hari Satu tu tadi.
Nambahka jaku iya, Datuk Amar Douglas Uggah madahka projek nya nyengkaum ngaga alai diau ke digaga nengah ungkus RM103 juta.
“Ngarika DCF enggau raban bansa Dayak Sarawak, aku ngenataika jaku terima kasih ngagai Perintah Sarawak ke dipegai Datuk Patinggi Tan Sri Dr Abang Abdul Rahman Zohari Tun Datuk Abang Openg.
“Keterubah suba, Perintah Sarawak meri kitai endur ke chukup manah di Kuching ditu alai ngaga projek tu.
“Udah nya, Perintah Sarawak meri kitai RM28 juta dikena ngaga projek.
“Ari sukung tu, kami ulih ngaga projek nitihka langgur baka sebedau tu,” ku iya nerang.
Datuk Amar Douglas Uggah maya nya bela madahka diri berasai lantang ati enggau pengawa ngaga projek taja betapi enggau penanggul ketegal COVID-19.
“Panggau Dayak tu nyadika kelai ngagai raban bansa Dayak bela ngambi bagi ba program pemansang di Kuching,” ku iya madah baru.
Nangkan ke nya, Menijer Besai Panggau Dayak Sendrian Berhad, Allistar Hilton Smith madah, projek nya bela mungkur blok alai diau ke diberi nama PD Residence.
Tu nyengkaum blok Kapitan enggau The Grange.
“Blok Kapitan tu lima ringkat peninggi enggau 30 unit alai diau ti dipelabaka deka berengkah digaga suku keterubah taun 2023.
“Lalu The Grange bisi 80 unit ti disadang digaga ujung taun 2023,” ku iya sambil madah projek deka bekenaka timpuh 30 bulan. -EDISI UKAS
Sumber dari : UKAS